Lançohet WISA: një hap për më shumë siguri dhe mbështetje për gratë në media
Dje u lançua projekti “Weaving Digital Safety: Albania’s Women Media Network Initiative (WISA)”, një nismë që synon të sjellë më shumë siguri, mbështetje dhe bashkëpunim për profesionistët e medias digjitale në Shqipëri.
WISA bashkon disa elementë shumë të rëndësishëm: kërkim të bazuar në fakte, rrjetëzim mes profesionistëve, ndërgjegjësim mbi të drejtat e punës, praktika për sigurinë digjitale në redaksi dhe bashkëpunim me institucione. Qëllimi është i qartë—të adresohen problemet reale që gazetarët hasin çdo ditë, sidomos në hapësirën online.
Një pjesë shumë e rëndësishme e projektit janë vetë përvojat e gazetarëve. Përmes diskutimeve dhe feedback-ut të vazhdueshëm, WISA do të përpiqet të përshtasë aktivitetet sipas nevojave reale të komunitetit të medias.
Gjatë eventit, Isa Amyzyraj foli për rëndësinë e zbatimit konkret të të drejtave të punës në media, veçanërisht në sektorin online, ku shpesh mungon mbrojtja e duhur.
Ndërsa Blerjana Bino theksoi se shkeljet e të drejtave të gazetarëve janë një realitet i përditshëm. Përmes këtij projekti, këto raste do të dokumentohen dhe, mbi të gjitha, do të ndërtohen forma konkrete mbështetjeje dhe sigurie përmes solidaritetit mes profesionistëve.
Në hapje të aktivitetit, Sabina Kodra prezantoi shtyllat kryesore të WISA-s dhe ngriti një pyetje që përmbledh gjithë idenë e projektit:
“Po sikur ta ndërtojmë fije pas fije, kërkim, rrjetëzim, të drejta pune, siguri digjitale, përgjigje institucionale, a mund të krijojmë diçka që vazhdon edhe pasi projekti mbaron?”
Projekti zbatohet nga AWA, në partneritet me SCiDEV dhe AGSH, me mbështetjen financiare të Bashkimit Europian në Shqipëri.
WISA synon të bëhet më shumë se një projekt, të jetë një hap konkret drejt një ambienti më të sigurt dhe më të drejtë për gazetarët në vend.